मेरो मन ऐसी खेलत होरी

मेरो मन ऐसी खेलत होरी ।।टेक. ।।
मन मिरदंग साज-करि त्यारी, तनको तमूरा बनोरी ।
सुमति सुरंग सरंगी बजाई, ताल दोउ कर जोरी ।
राग पांचौं पद कोरी ।।१ ।।मेरो. ।।
समकित रूप नीर भर झारी, करुना केशर घोरी ।
ज्ञानमई लेकर पिचकारी, दोउ करमाहिं सम्होरी ।
इन्द्रि पांचौं सखि वोरी ।।२ ।।मेरो. ।।
चतुर दानको है गुलाल सो, भरि भरि मूठि चलोरी ।
तप मेवाकी भरी निज झोरी, यशको अबीर उडोरी ।
रंग जिनधाम मचोरी ।।३ ।।मेरो. ।।
`दौल' बाल खेलें अस होरी, भवभव दु:ख टलोरी ।
शरना ले इक श्रीजिनको री, जगमें लाज हो तोरी
मिलै फगुआ शिवगोरी ।।४ ।।मेरो. ।।

---